[漢羅台語版] 鄭成功是中日透濫ê外來統治者

From: uibun
Date: 2011-05-04 02:11:32

[漢字+白話字版]

鄭成功是中日透濫ê外來統治者**

蔣為文/國立成功大學台灣文學系

這chām-á台南市政府koh teh宣傳鄭成功文化節。雖罔台南市政府chiah用心beh kā台南市sak上國際舞台ê原意值得肯定，m̄-koh辦理鄭成功文化節實在是「chhiàⁿ鬼the̍h藥單」，tú-hó凸顯政治人物對台灣歷史ê無知kap見笑。

鄭成功ê老爸鄭芝龍原底是福建省泉州府南安縣出身ê海賊，tī明清對抗當中，鄭芝龍選擇teh-tù滿清。鄭成功ê老母是日本長崎平戶ê田川氏。鄭成功tī日本出世到kah七歲chiah轉去福建。日本tī 1895年占領台灣ê時，刁工宣傳鄭成功是日本人，thang beh合理化日本統治台灣ê基礎。中國人mā利用鄭成功，講伊趕走荷蘭人是中華民族英雄。其實，鄭成功kan-taⁿ是一個中日透濫ê外來統治者niā-niā。

實在講，鄭成功攻佔台灣毋是出自歡喜甘願，是「phah輸走贏」，親像1949年蔣介石統治集團hit-khoán，按算殖民台灣thang反攻轉去中國。鄭氏家族內底khah有良心ê應該算鄭成功ê後生鄭經。鄭經來台了改「東都」做「東寧」，以王朝ê間格來經營台灣。當時清國為tio̍h封鎖東寧王朝，tō實施遷界移民政策，kā中國東南沿海居民往內地遷徙。想bē到按呢做soah顛倒逼東寧王朝kiâⁿ國際貿易路線、hō͘伊國力koh khah壯大，ta̍k國to以東寧王朝國王來稱呼伊。這段期間，滿清koh派人來hām鄭經參詳：若準放棄反清復明，東寧王朝ē-sái親像越南、朝鮮hit-khoán chiâⁿ做獨立ê王朝。可惜鄭經無放棄「反清復明」ê舊思維，路尾因為內亂soah hō͘滿清帝國消滅。

鄭成功kap東寧王朝hō͘咱啥款ê啟示leh？第一，台灣人ài建立家己ê台灣史觀。第二，台灣ê經濟ài國際化，m̄-thang中國化，chiah ē-tàng避免中國kā咱ê嚨喉la̍k tiâu leh。第三，台灣ài避免「飼老鼠咬布袋」，預防內賊通外鬼。

 

[漢字+台羅版]

鄭成功是中日透濫ê外來統治者**

蔣為文/國立成功大學台灣文學系

這tsām-á台南市政府koh teh宣傳鄭成功文化節。雖罔台南市政府tsiah用心beh kā台南市sak上國際舞台ê原意值得肯定，m̄-koh辦理鄭成功文化節實在是「tshiànn鬼the̍h藥單」，tú-hó凸顯政治人物對台灣歷史ê無知kap見笑。

鄭成功ê老爸鄭芝龍原底是福建省泉州府南安縣出身ê海賊，tī明清對抗當中，鄭芝龍選擇teh-tù滿清。鄭成功ê老母是日本長崎平戶ê田川氏。鄭成功tī日本出世到kah七歲tsiah轉去福建。日本tī 1895年占領台灣ê時，刁工宣傳鄭成功是日本人，thang beh合理化日本統治台灣ê基礎。中國人mā利用鄭成功，講伊趕走荷蘭人是中華民族英雄。其實，鄭成功kan-tann是一個中日透濫ê外來統治者niā-niā。

實在講，鄭成功攻佔台灣毋是出自歡喜甘願，是「phah輸走贏」，親像1949年蔣介石統治集團hit-khuán，按算殖民台灣thang反攻轉去中國。鄭氏家族內底khah有良心ê應該算鄭成功ê後生鄭經。鄭經來台了改「東都」做「東寧」，以王朝ê間格來經營台灣。當時清國為tio̍h封鎖東寧王朝，tō實施遷界移民政策，kā中國東南沿海居民往內地遷徙。想bē到按呢做suah顛倒逼東寧王朝kiânn國際貿易路線、hōo伊國力koh khah壯大，ta̍k國to以東寧王朝國王來稱呼伊。這段期間，滿清koh派人來hām鄭經參詳：若準放棄反清復明，東寧王朝ē-sái親像越南、朝鮮hit-khuán tsiânn做獨立ê王朝。可惜鄭經無放棄「反清復明」ê舊思維，路尾因為內亂suah hōo滿清帝國消滅。

鄭成功kap東寧王朝hōo咱啥款ê啟示leh？第一，台灣人ài建立家己ê台灣史觀。第二，台灣ê經濟ài國際化，m̄-thang中國化，tsiah ē-tàng避免中國kā咱ê嚨喉la̍k tiâu leh。第三，台灣ài避免「飼老鼠咬布袋」，預防內賊通外鬼。

--

Taiffalo's Study of Eco-linguistics of Society Tai-gi / Oat-lam Gian-kiu-sek & Center for Taiwanese Languages Testing & Department of Taiwanese Literature

National Cheng Kung University, TAIWAN http://uibun.twl.ncku.edu.tw http://ctlt.twl.ncku.edu.tw E-mail: (private)

E-mail: (office) Tel: +886-6-2757575 ext 52627 (O) Fax: +886-6-2755190 *******************