Lia̍t-ūi hiaⁿ-ché pêng-an: Lán lâi hoan-gêng Koeh Bûn-chhái ka-ji̍p TG-bāng ! TG-bāng lāi-té ,cha-bó͘ khah chió,góa kó͘-chhui Bûn-chhái lâi ka-ji̍p,i ū tap-èng. Bûn-chhái ché chit 6 tang lâi, tùi lâi siōng-khò kàu chò gī-kang, it-ti̍t chin chi-chhî TBTS kap TBBP, chha-put-to ta̍k-kî lóng lâi tàu kià cha̍p-chì,chio̍ng-chio̍ng oa̍h-tāng lóng jia̍t-sim chham-ú,si̍t-chāi chin kám-sim! Liān TBBP teng-kì ê tē-chí to khǹg in tau,ka-chài ū i ê hia̍p-chō͘,làn cha̍p-chì chiah ē-tit kè-sio̍k seng-chûn.Mā ka-chài ū i put-sî kā góa kó͘-lē kap tok-chhiok,góa chiah ē-tit kiâⁿ chit-tiâu lō͘ kiâⁿ chiah kú ! Pún-lâi i ê TOJ thêng-tō͘ bô siáⁿ hó,m̄-koh i ê sió-mōe- - - Bûn-eng ché(ū tâu-kó hoat-piáu tī TBBP kap TOJ) tùi Ko-hiông LMJ hia̍p-hōe ê Tâi-gí-bûn pan kiat-gia̍p liáu-āu,tiāⁿ siá chôan LMJ ê phoe hō͘--i,i koh phah-piàⁿ liān-si̍p,taⁿ chit-má chìn-pō͘ chin chē,tha̍k-siá lóng chiâⁿ hó-sè. Chêng 1-chām-á Tēⁿ Jî-gio̍k bo̍k-su ê [Ah-ūn Si-phian] beh phah-jī,góa tō-sī chhiáⁿ i tàu phah-jī--ê. Bûn-chhái ché ê chhiú-gē chin hó,bô-lūn sī chò- saⁿ iah-sī liāu-lí/hang-piáⁿ,lóng ū 1 thò! Chhiáⁿ ta̍k-ê siá-phoe hō͘--i. A-hūi