Tâi-gí-pán: 台語m̄是閩南語

From: uibun
Date: 2013-12-04 00:04:25

TGB ê iú-chì CTT!

Chit phiⁿ bûn-chiuⁿ ê Tâi-gí-pán í-keng siá hó, su-iàu ê lâng ē-sái the̍h-khí ēng.

台語m̄是閩南語

蔣為文

今年度(2013)立法院教育kap文化委員會委員鄭天財、李桐豪、孔文吉、蔣乃辛hām陳淑慧hit-kóa人提案凍結國立台灣文學館ê文學推展業務費十分一，in ê理由是台灣文學館tī「台灣本土母語文學常設展」lāi-té用tio̍h「台語文學」chit-ê詞。Chia-ê委員認為「台語」排斥tio̍h其他台灣ê語言，有否定客語hām原住民族語言mā是台灣語言ê意思。In koh要求ài kā台語改做閩南語、河洛語a̍h-sī福佬語。其實，chit kúi-ê委員是假藉語言平等ê名，做分化台灣族群koh打壓台灣認同ê夭壽代。理由是án-ne：

第一，「台語」是專有名詞，m̄是「台灣ê語言」ê簡稱。Nā照chit kúi-ê委員ê邏logic：用「台語」chit-ê詞，會kā「客語」kap「原住民族語言」排斥tī台灣ê語言之外。Án-ne，siōng tāi-seng ài改名ê tio̍h sī「台灣大學」！因為台灣有一百六十外間大學，憑啥物kan-taⁿ「台灣大學」號做「台灣大學」？原住民族像講「Seedig」(賽德克族) kap「Tao」(達悟族) mā tio̍h改名，因為「Seedig」kap「Tao」tī in族語lìn原意lóng是「人」ê意思。難道kan-taⁿ Seedig hām Tao chiah是人？

第二，台語chit-ê詞是經歷kúi百年來社會自然形成ê慣勢用語。連戰ê阿公連橫tī 1933年完成ê台語專冊《台灣語典》mā用台語chit-ê詞。外來政權中華民國「台灣省國語推行委員會」tī 1955年出版ê《台語方音符號》，kap國防部tī 1958年出版《注音台語會話》(封面koh有蔣中正ê題字)，lóng接受使用台語chit-ê詞。一直到差不多1960年代以後，中國國民黨為tio̍h加強kā台灣人同化做中國人，tō採取「去台灣化」政策，全面kā台語ngē改做閩南語！

第三，福建閩南地區mā有客語使用者。Chit kóa委員認為台灣有客語kap原住民族語使用者，所以「台語」bē-sái獨佔「台語」chit-ê詞。照in ê logic，中國福建閩南地區mā有少數客人tòa ê 所在，像講詔安kap南靖hit kóa地區。為tio̍h mài排斥客人，mā無應該使用閩南語chit-ê詞chiah tio̍h！

第四，廣東mā有閩南語ê分布。所謂ê閩南語，伊分布ê地點m̄-nā tī福建南pêng，廣東mā有，特別是廣東東pêng潮汕kap海陸豐地區。照chia委員的歪理，使用閩南語chit-ê詞袂輸kā廣東地區ê閩南語排斥在外。Che hō͘廣東地區ê閩南語使用者情感siōng beh án-chóaⁿ chih-chài ē-tiâu leh？

第五，「閩」字有侮辱、chau-that人ê意思。根據東漢「許慎」《說文解字》kap清國「段玉裁」《說文解字注》ê解說，閩南語ê「閩」字是蛇種、野蠻民族ê意思，是看閩南地區ê先住民kap in ê後代無夠tāng ê ì-sù。聯合國tī 1948年公布《世界人權宣言》宣示人人chū出世tō平等，無應該受任何歧視。Chit-kóa委員nā真認同種族平等，tō無應該強迫別人用有侮辱性質ê族名。

第六，河洛語a̍h-sī福佬語lóng無台灣代表性。河洛語a̍h-sī福佬語lóng源自「Hoklo」 chit-ê詞。根據美國傳教士Kennelly tī 1908年編譯ê《中國坤輿詳誌》記載，Hoklo chit-ê詞是廣東在地人對潮州地區ê潮州人ê稱呼。Hoklo後來hông寫做「學老」、「福狫」、「河洛」a̍h-sī「福佬」chit-kóa bô-kâng ê漢字。無論Hoklo hông寫做siáⁿ漢字，chit-ê詞lóng無法度代表台灣人ê母語。

第七，現實上，台語族群無人公開主張客語kap原住民族語無屬台灣ê語言。以當事者國立台灣文學館做例，hông指控有排他性ê「台灣本土母語文學常設展」內容本底tō包含客語文學、原住民族語文學kap台語文學。Nā 因為用台語文學chit-ê詞tō hông指控講排他性，實在chok áu-bân。

第八，1996年公布ê《世界語言權宣言》第31 kap 33條分別指出講，「所有語言社群lóng有權tī所有範疇kap所有場合lāi-té保存koh使用伊適合ê名姓系統」，「所有語言社群lóng有權用家己ê語言稱呼家己」。台語chit-ê詞是大多數台灣人ê慣習稱呼，當然ài受tio̍h尊重。

Chit-kóa委員nā有心主張族群平等，tō ài趕緊撤銷凍結台灣文學館預算ê提案。Nā無，等kah本土社團發動抗議活動，chit-kóa委員chiâⁿ-chò teh死馬英九政權ê siōng-bóe hit kúi-ki毛tō後悔bē-hù。

中文版原載台灣時報專論2013/11/27 http://www.twtimes.com.tw/index.php?page=news&nid=374541