Kokui chianpoe takke ho, goa si Phokgoan

From: Phokgoân
Date: 2007-04-19 01:38:44

Kokūi chiânpoē ta̍kke hó, Goá pài 4, to̍hsī bînáji̍t to̍h beh khì chòpeng ah. M̄koh, goá ū 1 kiaⁿ tāichì beh pàithok ta̍kke. Tāichì sī ánne -- Goá tī "Yahoo! 奇摩家族" kui 1 ê sin thólūn khu, hōchò "Tiānnáu Tâibûn". Inūi kîsi̍t bānglō͘ téngbīn thêkiong kài choē kihoē, hō͘ sèkài siōng só͘ū ê lâng lâi kā nńgthé hoane̍k chò katī ê gígiân. Goá kòjîn jīnûi, che si̍tchāi sī Tâibûn kongpêⁿ kèngcheng siōngkài hó ê 1 ê kihoē! Jîchhiáⁿ chitmá tiānnáu susiá Tâibûn mā íkeng lúlâilú hongpiān. Chíiàu lán kèsio̍k tī tiānnáu, tī bānglō͘ hoat siaⁿ, Tâibûn ê siaⁿim kap Tâioân ê bûnhoà to̍h ētàng tāitāi seⁿthoàⁿ. Sèkài siōng ê lâng to̍h kohkhah ētàng thiaⁿtio̍h lán ê siaⁿim. M̄koh, Goá mā ū tangsîá ē thiaⁿtio̍h chiânpoē kóng, "Tiānnáu kài pháiⁿ chhòng, goá thiaⁿtio̍h tiānnáu to̍h hun khì ah!" Mā ē mn̄g goá chi̍tkoá khah kichhó͘ ê būntê. Suijiân goá kámkak kā in tàu káikoa̍t būntê goá kài hoaⁿhí, m̄koh, goá kámkak ánne si̍tchāi sī chin bôchhái -- Tiānnáu tùi lán Tâibûn ū kài toā ê pangchō͘, lán si̍tchāi bô èngkai kiaⁿ tiānnáu! Nāsī lán bô khì chhap tiānnáu ê tāichì, tiānnáu to̍h boē lâi chhap lán ê tāichì. Só͘í, goá siat chitê kài kántan ê "Tiānnáu Tâibûn http://tw.club.yahoo.com/clubs/tiannau " thólūnkhu. Kîsi̍t Yahoo teh chioân Lômájī tiāuhō khah bô hiah hó, m̄koh inūi i súiōng kài kántan (kài choē kokhāu, koktiong ha̍kseng lóng teh iōng) só͘í goá boéá a̍hsī koattēng khui tī chia. Bo̍kte̍k to̍hsī beh hō͘ bat tiānnáu ê lâng lâi chioân m̄bat tiānnáu ê lâng, nāchún tiānnáu súiōng Tâibûn hongbīn ū būntê, ta̍kke mā chaiiáⁿ khì toh-ūi mn̄g, íchêng mn̄g koè ê būntê, mā ētàng ánne chénglí khílâi. Siūⁿ boēkàu goá túá siat chitê chām, to̍h beh khì chòpeng ah! M̄koh goá a̍hsī koattēng seng kongpò͘ chitê só͘chāi hō͘ ta̍kke ētàng līiōng. Goá bô tīleh ê sîchūn, Pektiong Tân lāusu èngkai ētàng tàu koánlí pánbīn (thâi chitkoá pùnsò phoe); nā ūlâng mn̄g būntê Úngiân Iûⁿ lāusu kap goá chi̍tkoá pêngiú èngkai mā ētàng hoêtap. Hibāng ta̍kke ētàng lâi līiōng chitê pêngtâi. Kā Tâibûn ê tiānnáu ê kokchióng chusìn chénglí chi̍tkoá khílâi. Jîchhiáⁿ siat tī "Yahoo! 奇摩" māsī siūⁿkóng hoānsè ētàng khip-ín tio̍h sin ê siàuliânlâng. Siōng tiōngiàu ê -- tiānnáu si̍tchāi kài tiōngiàu, chhiáⁿ ta̍kke m̄thang kiaⁿ tiānnáu! Choèāu chiok ta̍kke sinthé kiānkhong, sūgia̍p sūnlī, Tâibûn chhutthâuthiⁿ!Phokgoân, Apr. 18th, 2007