[tgb] FW: 「咱ê」？「話」？ Lau Seng-hian sia-e

From: Hak-khiam TiuN
Date: 2010-05-07 10:06:56

http://blog.roodo.com/senghian/archives/12291467.html「咱ê」？「話」？網路頂一篇文章引聯合國整理ta̍k所在語言使用ê情形，斷講「廣東話」受聯合國承認做「語言」，按呢講無--打-緊，koh順紲放屁相連累牽拖講：台灣話雖bóng tshui-sak ê人bē少，m̄-koh就是無kap「廣東話」sio-siâng ê資格。作者kiám-tshái是m̄知聯合國早早就發表《文化多樣性宣言》、《世界語言權宣言》等等重要文件，伊規粒山m̄看，suah直直相樹跤ê狗蟻塔，koh the̍h桶來窒窗，kā逐國家／地區ê主要語言清單，當做是「承認」語言ê名單，tsit聲有影piàng--a。翻頭來想，聯合國tsiâⁿ做一个追求「文化多樣性」、「語言人權」ê機構，thài-thó有可能會做「語言差別地位」ê認定--leh？Kan- taⁿ按呢問，咱就知hit篇文章講了無影--lah。若咱進一步來讀hit篇文章，koh會發見hit篇文章ê定義，是取有列tī聯合國地區／國家日常 用語，而且是某一國／地 ê leading languages in daily life，來當做「聯合國承認ê語言」，若按呢，Min Nan（閩南話）mā有符合定義--leh，是按怎作者無beh講？可見伊有影是teh腫頷冒liap。咱斟酌kā想，作者根本是kā「客觀ê語言統計狀況」，hut做語言地位ê認定--a，究真語言ê認定，to m̄ 是phīng「大／細」teh比資格--leh，也就是講，聯合國tsit个資料，根本無hit號「承認某物腔口做語言」ê「意思」，mā無hit號講號 做無列tiàm內底ê語言，聯合國就「無承認」ê「意涵」，結果tsit款資訊透過網路，濟濟人suah hō͘伊牽去lōng-lōng-se̍h。話講倒轉--來，廣東話ê地位kap in話文ê發展實在真值得咱參考，若比起taⁿ台灣話kap台語文tī台灣ê情形，廣東話tī香港、廣東ê使用kap受尊重ê程度確實超過台灣濟濟，有去 過香港ê朋友，對香港ê路--ni̍h滿盡是用廣東話書寫ê廣告應該印象真深，平平是城市，香港少年人攏講廣東話，若台北--leh，講台語ê少年人犯勢 比外星人koh khah少。另外，香港公司用濟濟資金、上好ê人才、上進步ê技術直直teh phah講廣東話ê電影（khah出名ê親像《如來神掌》、《長江七號》、《葉問》等等），透過大胚模ê宣傳，出口去全世界，台灣--leh？有一兩支仔 講khah濟台語ê片仔，咱就歡喜kah bē輸半暝出一个月，直謝天謝地，謝hāu-hia謝飯籬，僥倖--o͘h， tsit兩个在地母語ê光景精差有偌大你就知。頂kuân tsiah-ê lia̍h外，長期做語言人權kap語言復振研究ê台東大學教授張學謙特別指出，看待一个語言，ài注意伊本身ê差異 (abstand) kap伊ê發展hām地位 (ausbau)，ausbau ê發展若無夠，就khah會hông看無目地，台語taⁿ猶無官方地位，咱講台語是語言，kan-taⁿ是指伊語言本身有獨立性 (abstand)，總--是，伊欠缺語言應該有ê權利kap地位。簡單來講，咱ê語言tsit-má是 [＋abstand]、[－ausbau]，tio̍h phah拚爭取台語變做一个 [＋abstand]、[＋ausbau] ê語言，tse是咱共同ê目標。但礙，筆者有tang時á suah bē-kā-kin會煩惱，咱 tī [＋ausbau] 猶未爭取著以先，kám會就teh kā [＋abstand] 損tn̄g--去，咱看目今ê tsi̍t-kuá文本，ná親像無tsiok致重台語本身「句法」kap「詞彙」ê獨立性，無張無持teh趁華語，若按呢落--去，kám會台語ê權利 kap地位猶teh爭取（[－ausbau]），伊suah先變做欠缺獨立性質（[－abstand]）ê語言，hō͘人先扛去種tī歷史ê檔案室？

-- 您已訂閱「Google 網上論壇」的「Tai-gu-bang」群組，因此我們特別傳送這封郵件通知您。 如要在此群組張貼留言，請傳送電子郵件至 。 如要取消訂閱此群組，請傳送電子郵件至 。 如需更多選項，請造訪此群組：http://groups.google.com/group/taigu?hl=zh-TW。